Maradhi ya Minyoo Sasa Basi, Halmashauri ya Wilaya ya Babati

Posted on: April 6th, 2018

Watumishi wa Idara ya Afya na Elimu katika Halmashauri ya Wilaya ya Babati wametakiwa kusimamia vyema na kwa weledi zoezi la umezeshaji dawa za Minyoo ya Tumbo katika shule za Msingi.Hayo yamesemwa na Mkurugenzi Mtendaji wa Halmshauri  ya Wilaya ya Babati ndugu Hamis Idd Malinga katika kikao cha utekelezaji wa agizo hilo katika ukumbi wa Halmashauri ya wilaya ya Babati kati ya Maafisa Elimu,Maafisa Afya pamoja na Warataibu wa zoezi la umezeshaji wa dawa za Minyoo Tumbo.

”Tumieni Elimu, Uzoefu na Weledi kuhakikisha zoezi la umezeshaji dawa  za Minyoo Tumbo kwa wanafunzi wa shule za Msingi linafanikiwa kwa kiwango kikubwa” Amesisitiza Mkurugenzi Mtendaji, Aidha  amesema kufanikiwa kwa zoezi hilo kutafanya watoto wakue vizuri na kukuza uwezo wa ufahamu na uelewa shuleni.

Naye Mratibu wa zoezi hilo ndugu James Mleli amesema zoezi hilo litaanza kwa uhamasishaji kuanzia ngazi za vitongoji,vijiji na shule ili kuwapa jamii uelewa na umuhimu wa kumeza dawa hizo.Umezeshaji dawa  za Minyoo Tumbo katika Halmashauri ya Wilaya ya Babati linategemea kufanyika tarehe 19/4/2018 kwa shule za Msingi 143 zenye wanafunzi 84,354 wenye umri kati ya miaka 5 hadi 7.